Mat 24 | MED | STEP | Jisas ni, manga wingti ou ei, wak rop kelip mbi nimba puⱡnga, elim nga kitip kᵾni wu ni kᵾⱡ ndi ok, elim wi rok manga wingti ei kᵾn, wᵾng ila manga morum mbᵾ, tᵾk ora ndurᵾng.

Matthew 24

Jisas Ndi, Manga Wingti Ou Ei Ʉtkil Romba Nitim

1 Jisas ni, manga wingti ou ei, wak rop kelip mbi nimba puⱡnga, elim nga kitip kᵾni wu ni kᵾⱡ ndi ok, elim wi rok manga wingti ei kᵾn, wᵾng ila manga morum mbᵾ, tᵾk ora ndurᵾng. 2 Jisas ndi, wu kᵾⱡ ik punt ropa nimba mel, “Enim manga mbᵾ kupa kanmin. Ei nga, na enim ik ti kundᵾp namp, manga kanmin ei nga ku mbᵾ, rok gu ndangina, manga ei ᵾtkil ropa mba pemba,” nitim.

3 Wote, Jisas Olip komnga nila oⱡa mba murum ni kᵾn, elim nga kitip kᵾni wu kᵾⱡ ndi, raka nᵾk rᵾk ok, elim waldᵾk nᵾk mel, “Nim nᵾn uⱡ mbᵾ, nant kᵾn etmba ei, tᵾn kundᵾk nana pilamin! Wote, ui pora nangga, nim yant uin ei nga namba uⱡ mbᵾ, itangga kandpᵾn pilip muⱡmin,” nᵾtᵾng. 4 Jisas ndi, punt ropa nimba mel, “Enim wamp ti ndi, tᵾpa tiki pundᵾmba ei nga, tᵾk mendᵾk muⱡᵾi! 5 Ei nambuⱡ emel, wamp minal, na nga mbi ila onmᵾn nᵾk ei mel ning, ‘Na wu Kraist,’ nangina, wamp minal nᵾk tiki punding. 6 Kona nondpa mbila, el etᵾk, el nung rok eing ik ei piling, wote kona elpa mbila, el enmin nangina, rᵾnang ik ei piling ku. Wote, ik mbᵾ pilᵾng ei kᵾn, mundmong iti nᵾtᵾi! Ei nambuⱡ emel, uⱡ mbᵾ mel etmba mint, wote ui pora nimba ei kokila. 7 Ei kᵾn, mᵾi kona mat kᵾn, mat kᵾn el iting. Wote, wu rᵾⱡaip mat, en enim rᵾk el itangina, kump kun kan tepa, kilimbᵾmp kona mat ila ambuⱡpa, oⱡa tᵾpa etmba. 8 Uⱡ kᵾⱡ mel kuimp tepa etmba. Ei amp kangambuⱡa ming pilik, kuimp tek mindil normin ni mel etmba.

9 “Wote ei kᵾn, enim imp molk, uⱡ mbun mindil nui mbᵾ ngok, rok kondᵾk iting. Ei nambuⱡ emel, enim na nga nᵾndᵾk kongun endᵾtmin uⱡ ila kandᵾk, mᵾi kona wamp mbᵾ ndi, enim numan ngui ngᵾnging. 10 Ui ei kᵾn, wamp minal ndi, en enim nga mondpa pili ei, wak ruing. Wote, mondpa pili wamp mat ndi, mat kᵾn oi kan pendᵾk rᵾk muⱡangina, numan ropa pemba. 11 Ei kᵾn, wu mat kep, nok ok, en enim painui wu mbᵾ onmᵾn nᵾk, wamp minal nᵾk tiki punding. 12 Ei kᵾn, uⱡ kit mbᵾ nga roldᵾnga pangga, wamp numan ngui uⱡ ei, wak ruing. 13 Wote, wamp ti ui ei kᵾn, elim nga mondpa pili wak rui narᵾpa, pewa aiwa nimba pangga, ui ei pora nim ndam, wamp ei Got ndi, etpa peng kont tᵾmba. 14 Wote, Got nga wamp tᵾpa mumuk rui uⱡ ei nga rᵾnang ik kai ei, nᵾk pora ndangina, mba muⱡ uⱡ mbila, pilik kapⱡa endᵾng ei kᵾn, pora nimba ui ei omba.

15 “Painui wu Daniyel ndi, nitim ni mel, uⱡ kit ti kona wingti ila anggilpa moⱡum kanᵾng ndam, enim Juriya kona ila moⱡᵾng wamp mbᵾ nᵾng nᵾk, wi komnga mbila pᵾi! 17 Wote, wamp ti manga ᵾi oⱡa orunga moⱡum ti mana omba, elim nga mel wal mbᵾ, timp nimbᵾ ui nᵾwangga, mon nᵾng nimba pangga! 18 Kongun kuimbal pum ti ndi, mang kona yant omba, elim nga wal pᵾki kᵾⱡ timp nimba ui nᵾwangga! 19 Ui ei kᵾn, amp kangambuⱡa mundi na, wote amp kangambuⱡa nana aim ngᵾk moⱡᵾng mbᵾ, etᵾk iting mel nant ndam, kont enim. 20 Kongᵾndᵾp mbin ui ei, kona tipan poⱡum ei kᵾn kep, kona mowi kor ei kᵾn, ekit ui nᵾwangga nᵾk, Got kᵾn atinga rok muⱡᵾi! 21 Nambuⱡ emel, ui ei kᵾn, uⱡ mbun iti ekit omba mbᵾ, muⱡ mᵾi raⱡ mim itim ei kᵾn, omba akup ui ila iti nᵾtᵾtᵾm uⱡ mat omba. Omba wote, ui mbᵾ kᵾn, uⱡ kit ei mel ti pi napᵾmba. 22 Got elim nga kᵾmp ropa titim wamp mbᵾ nga nindpa, ui kit ekit om ei, nondpa pora nangga, ni nandᵾⱡnga ndam, wamp mat kont molk, ruⱡ pi napᵾⱡᵾngina. 23 Ui ei kᵾn, wamp ti ndi, nim kundpa nimba mel, ‘Kraist ei ya onum kana!’ nimba. Muna, ‘Int onum kana!’ nᵾm ndam, ik ei, enim mondᵾk pili nᵾpilᵾi! 24 Ui ei kᵾn, wu mat Kraist ralk, wote mat, Painui wu ralk, uⱡ min ngᵾn pi mbᵾ nga ou nduk iting. Nambuⱡ emel, uⱡ ei mel itangina, Got nga kᵾmp ropa tᵾtᵾm wamp mbᵾ, Got wak reing nᵾk kongun mindil nok iting. 25 Uⱡ wote, etmba ei nga, enim unt nᵾmp ndoimp rondᵾnt ei pilik muⱡᵾi!

26 “Ei kᵾn, enim wamp ti ndi, kundpa nimba mel, ‘Kraist ni omba, kona kui waka ila morum kᵾnᵾiya!’ Nᵾng ndam, kona ila pi nᵾpᵾi! Muna nᵾk mel, ‘Ya manga ila mo ropa morum kᵾnᵾiya!’ Nᵾng ndam, nᵾng ik ei, mondᵾk pili nᵾpilᵾi! 27 Kona kiraipa etᵾm ei kᵾn, rᵾⱡang ei, al orunga etpa mba, wᵾl orunga kapⱡa enduⱡnga, kapⱡa endᵾtmin. Ni mel ku, Muⱡᵾl Wu Kupa ei, muⱡ kona ei, wak ropa om ei kᵾn, kandᵾk wamp ndi, kandᵾk kapⱡa inding. 28 Kng, na mel mat purpa tetᵾm ila, kᵾi tap ok, rung tᵾtmᵾn,” nᵾtmᵾn.

Muⱡᵾl Wu Kupa Ei, Yant Omba

29 “Mindil nok moⱡᵾng ui mbᵾ, pora nim ei kᵾn nondpa, ant ei rumbᵾⱡ moⱡmba, wote kona kalimp nga rᵾⱡang ei kumbᵾⱡpa, oⱡa muⱡ ila mipil rangᵾnt mbᵾ, ndanda nᵾk mana uing. Wote, oⱡa muⱡ ei, ambuⱡpa gi ndurum mel mbᵾ nga ronduⱡ ei, rowa ndumba.

30 “Ei kᵾn, na Muⱡᵾl Wu Kupa ei, uimp ei nga tip timal ti, wi muⱡ ila ekit wangga kᵾn, mᵾi kona wamp mbᵾ kandᵾk, ka itangina, na Muⱡᵾl Wu Kupa ei, oⱡa kopa pol ila, ronduⱡ ei kun, rᵾpndi nga rᵾⱡang pol ila tᵾmᵾm tep wamba, mon pangga kᵾning. 31 Wote, Got nga kowa pela ik ei, ronduⱡ nangga, elim nga anggelo mbᵾ tᵾpa mundangga, puk muⱡ uⱡ tepa mba, punt rorum kona mbila, elim nga kᵾmp ropa tᵾtᵾm wamp mbᵾ, tᵾpa tenda etmba,” nitim.

32 “Nde ui mun etᵾm uⱡ ei ndi, enim etpa ora ndumba. Nde ui ongum kᵾⱡ mun etpa, oⱡa orum ei kᵾn kandᵾk, kona ant mba enim nᵾtmin. 33 Ei mel, ya nᵾnt uⱡ mbᵾ mel em kandᵾk, Muⱡᵾl Wu Kupa ei, yant uimp nitim ui ndi, nondpa enim kant ei, ka nᵾk pilik muⱡᵾi! 34 Enim ik kupa ei, kundᵾp nᵾnt. Akup kalk tᵾnmᵾn wamp mbᵾ, kolk pora ndui nᵾndangina, ya nᵾnt uⱡ mbᵾ mel, ekit wangga kᵾning. 35 Muⱡ mᵾi raⱡ pora ninggil. Ei wote, na nga ik ei, ama pora ni nanᵾmba.

Muⱡᵾl Wu Kupa Ei, Yant Omba Ui Ei, Wamp Ti Pili Napᵾtᵾm.

36 “Muⱡᵾl Wu Kupa ei omba ui ei, rumbᵾⱡ tila, muna rᵾnggilmᵾ, muna ant mong nant tila omba ei, wamp ti ndi, pili napᵾtᵾm. Muⱡᵾl Wu Kupa ei, elim kep, oⱡa muⱡ ila anggelo mbᵾ kep, pili napᵾtmᵾn. Wuta elim mint pilpa morum. 37 Ui ni kᵾn, unt wu Nowa murum ui ila wamp mbᵾ, uⱡ etᵾng ei mel ku, Muⱡᵾl Muⱡᵾl Wu Kupa ei, yant omba ui ei kᵾn, ei mel ku etᵾk muⱡing. 38 Nu kui ui nᵾwi kᵾn, kng rᵾng mel mbᵾ nok, wu amp tᵾk, amp wu puk etᵾk moⱡina, wu Nowa ni omba, nu okak manga ila murᵾk purum. 39 Nowa itim uⱡ ei kandrung. Ei wote, tᵾk mindi namᵾndᵾk moⱡina, nu kui omba wamp nimbᵾ, tᵾpa mepa purum. Muⱡᵾl Wu Kupa ei omba ei kᵾn, mana wamp mbᵾ ndi, ei mel ku etᵾk muⱡing. 40 Ui ei kᵾn, wu raⱡ pana kongun etᵾk muⱡᵾnggil, ti tᵾpa mepa mba, ti mondpa kelpa mba. 41 Ei mel ku, amp raⱡ oka pek rok muⱡanggila, ti tᵾpa mepa pangga, ti moⱡmba. 42 Nim tᵾk mendᵾk muⱡi! Ei nambuⱡ emel, nim nga Wu Nuim ei omba ui ei, nim pili napilkᵾn morᵾn. 43 Ik kᵾⱡ pilᵾi! Wamp ti ndi, elim nga manga ei, kindᵾp wamp ti ndi, akpa kindᵾp nomba ant mong ei, pilinga ndam, rᵾp etpa kandpa muⱡangga, kindᵾp wamp ei ndi, ᵾki nakᵾⱡnga. Ei kᵾn, enim rᵾk rᵾk tᵾk kun etᵾk muⱡᵾi! Nambuⱡ emel, Muⱡᵾl Wu Kupa ei, enim tᵾk mindi namᵾndᵾk moⱡᵾng, ant ni kᵾn omba.

Kindmant Wamp Ti Ndi, Elim Nga Nuim Ei Nga Teng Ndangga

45 “Wu nuim ti mba etpa kᵾn, elim nga kindmant wu ti, kongun teng ndupa pilpa kongᵾndpa etᵾm? Wu ei, elim nga manga ei rup itangga nimba, mbi ropa tᵾpa mondpa, wamp mbᵾ rᵾng nuing ant ei kᵾn, rᵾng mbᵾ kaⱡpa ngumba itangga nᵾtᵾm. 46 Kindmant wu ei, elim nga nuim ei ndi, nᵾtᵾm ei mel kongun mbᵾ etpa moⱡnga, wu nuim ou ei omba, kandpa kai pilinga, kongun wu ei elim kai pᵾtᵾm. 47 Enim ik kupa ei, kundᵾp nᵾnt, wu nuim ei ndi, kindmant wu ei tᵾpa, elim nga pana kongun na, kng mel na mbᵾ pᵾkᵾ rᵾp itangga nimba. 48 Wote, kindmant wu ei, wu kit ti ndam, elim ndi, nimba mel, ‘Na nga wu nuim ei tᵾkrᵾpa yant ui nawᵾmba,’ nimba. Wote elim nga kindmant kongun kup wamp mbᵾ, tᵾmbᵾⱡ ndi ropa, nu ronduⱡ normin wamp mbᵾ kᵾn, rᵾng nomba, nu ronduⱡ nomba etpa moⱡmba. 50 Ei kᵾn, kindmant wu ei nga, elim nga nuim ei, elim tᵾpa mindi namᵾndpa moⱡum ant mong ei kᵾn omba. 51 Wote ei kᵾn, wu nuim ei ndi, kindmant wu ei, tᵾmbᵾⱡ ndi ropa tᵾpa, ik kol wamp mbᵾ kᵾn, mindil nok mormin kona ila kup indangga muⱡing. Kona ila mindil kolk, ka etᵾk gu konggilik muⱡing.